Tónleikar í Langholtskirkju

Tónleikar í Langholtskirkju

Kór Langholtskirkju heldur tónleika 30. apríl kl. 20:00 undir stjórn Garðars Cortes, skólastjóra Söngskólans í Reykjavík. Flutt verða tvö meistaraverk eftir Giacomo Puccini; Messa di Gloria og Requiem. Kórinn fær til liðs við sig einsöngvarana Gissur Pál Gissurarson tenór og Odd Arnþór Jónsson baritón, sem báðir stunduðu nám hér við skólann. Einnig má taka fram að margir meðlimir kórsins stunda nám eða hafa lokið námi við Söngskólinn í Reykjavík. Til að mynda syngja níu nemendur í kórnum, sem tóku þátt í uppsetningu Nemendaóperunnar á Töfraflautunni eftir Mozart núna í vetur.
Starfsemin í Langholtskirkju er dýrmætur vettvangur fyrir ungt tónlistarfólk að spreyta sig, t.d. heldur Listafélag Langholtskirkju tónleika Ungra einsöngvara á hverju ári og fá þá söngvarar úr röðum kórsins tækifæri til að koma fram.

Messa di Gloria (útgáfuár 1880) er einstaklega fallegt verk sem heyrist alltof sjaldan hér á landi. Messan markar mikilvæg skil í lífi og starfi óperuskáldsins Giacomo Puccini, þar sem hann hafði tekið ákvörðum um að helga sig alfarið óperutónlistinni í stað kirkjuverka. Aðaláhrifavaldur ákvörðunar var óperan Aida eftir Giuseppe Verdi sem heltók huga og hjarta Puccini. Margir hafa haldið því fram að Puccini sé að kveðja kirkjutónlistina með þessu verki.

Útgáfufyrirtækið Ricordi bað Puccini um að semja Sálumessu (Requiem) til að heiðra minningu Verdi. Hann varð við þeirri beiðni og Requiem (útgáfuár 1904) var frumflutt á fjögra ára dánarafmæli Verdi. Þetta er í fyrsta skiptið sem verkið er flutt hér á landi með harmóníum og víólu.

Gissur Páll er af mörgum kunnur í íslensku tónlistarlífi, en hann hefur sungið sem einsöngvari við ýmis tilefni. Hann hóf nám sitt við Söngskólann árið 1997 hjá Magnúsi Jónssyni. Árið 2001 hélt hann til Ítalíu þar sem hann stundaði söngnám við Conservatorio G.B. Martini í Bologna.
Eftir námið hefur hann komið fram m.a. á Ítalíu og í Japan. Hann hefur unnið til verðlauna í söngkeppnum, s.s. í söngkeppninni Flaviano Labò og í söngkeppni í Brescia. Vorið 2012 hlaut Gissur Íslensku tónlistarverðlaunin fyrir túlkun sína á Rodolfo í La Boheme hjá Íslensku óperunni.

Oddur Arnþór hefur einnig haslað sér völl í íslensku tónlistarlífi, þótt hann sé að mestu búsettur í Austurríki. Hér við Söngskólann í Reykjavík stundaði hann nám hjá Ólöfu Kolbrúnu Harðardóttur og Alex Ashworth. Í beinu framhaldi fór hann í Universität Mozarteum í Salzburg, þaðan sem hann lauk meistaragráðu í söng árið 2014. Oddur er framúrskarandi söngvari en hann hefur hlotið fjölda viðurkenninga í alþjóðlegum keppnum. Sem dæmi má nefna að hann sigraði Brahms-keppnina í Pörtschach í Austurríki; varð þriðji í Schubert-keppninni í Dortmund og þriðji í Musica Sacra-keppninni í Róm. Hann fékk Schubert-verðlaunin og verðlaun fyrir besta ljóða- og óratóríuflytjandann í Francesc Viñas-keppninni í Barcelona.

Sjáumst í Langholtskirkju á sunnudaginn 30. apríl kl. 20:00.
Miðasala: https://tix.is/is/event/3980/kor-langholtskirkju-flytur-puccini/

Kristbjörg og Salný halda Framhaldsprófstónleika

Kristbjörg og Salný halda Framhaldsprófstónleika

Kristbjörg Lára Gunnarsdóttir og Salný Vala Óskarsdóttir halda Framhaldsprófstónleika mánudaginn 1. maí kl. 16:00. Meðleikarar þeirra á tónleikunum eru Hólmfríður Sigurðardóttir og Elín Guðmundsdóttir.
Gestasöngvarar sem koma fram á tónleikunum eru Birgir Stefánsson, Halldóra Ósk Helgadóttir og Magnús Már Björnsson.

Þær eru báðar nemendur Hörpu Harðardóttur.
Tónleikarnir fara fram í Snorrabúð. Allir velkomnir og aðgangur ókeypis.

Pétur heldur Framhaldsprófstónleika

Pétur heldur Framhaldsprófstónleika

Pétur Úlfarsson heldur Framhaldsprófstónleika næstkomandi sunnudag kl. 16:00. Meðleikari hans á tónleikunum er Kristinn Örn Kristinsson. Þeir fá til sín marga skemmtilega gesti; söngkonuna Hönnu Ágústu Olgeirsdóttur, fiðlu- og píanóleikarann Hjalta Nordal, fiðluleikarann Júníu Lin Jónsdóttur, víóluleikarann Fidel Atla Quintero Gasparsson og sellóleikarana Hjört Páll Eggertsson og Laufeyju Lin Jónsdóttir.

Tónleikarnir fara fram í Snorrabúð. Allir velkomnir og aðgangur ókeypis.
Pétur er nemandi Ólafar Kolbrúnar Harðardóttur.

Pétur Plakat TILBÚIÐ
Dagný, Guðný og Karlotta halda Framhaldsprófstónleika

Dagný, Guðný og Karlotta halda Framhaldsprófstónleika

Dagný Björk Guðmundsdóttir, Guðný Guðmundsdóttir og Karlotta Dögg Jónasdóttir halda Framhaldsprófstónleika saman næstkomandi laugardag kl. 17:00.
Meðleikari þeirra á tónleikunum er Hrönn Þráinsdóttir.
Gestasöngvarar sem koma fram á tónleikunum eru Berglind Dögg Helgadóttir og Birgir Stefánsson.

Þær eru allar nemendur Ólafar Kolbrúnar Harðardóttur.
Tónleikarnir fara fram í Snorrabúð. Allir velkomnir og aðgangur ókeypis.

Plakat tilbúið
Tónleikar

Tónleikar

Nemendur á söngnámskeiði Söngskólans í Reykjavík syngja á tónleikum í Hásal, þriðjudaginn 25. apríl kl. 19:30. Elín Guðmundsdóttir leikur á píanóið með nemendunum

Frítt inn og allir velkomnir

Íris Erlingsdóttir hefur umsjón með tónleikunum

Systkinatónleikar í Fella- og hólakirkju

Systkinatónleikar í Fella- og hólakirkju

Systkinin Guðfinnur og Kristín Sveinsbörn halda tónleika í Fella- og hólakirkju, á fimmtudaginn 20. apríl kl. 20:00. Þetta er þriðja árið í röð sem þau halda Systkinatónleika saman.
Þau eru bæði fyrrum nemendur við Söngskólann í Reykjavík, Guðfinnur var nemandi Ólafar Kolbrúnar Harðardóttir en Kristín var nemandi Hörpu Harðardóttur. Kristinn Örn Kristinsson, meðleikari við skólann, spilar á píanóið með þeim á tónleikunum.

Kristín Sveinsdóttir byrjaði ung að syngja í Langholtskirkju hjá Jóni Stefánssyni. Hún kom því með gott veganesti inní Söngskólann í Reykjavík, árið 2008. Kristín hefur átt mjög spennandi og fjölbreytt líf í sönglistinni, m.a. ferðaðist hún í kringum heiminn með Björk Guðmundsdóttir vegna Biophilia. Árið 2015-2016, var Kristín meðlimur í Scala-academíunni, þar sem hún stóð sig einstaklega vel í hlutverki Annarra dömu í Töfraflautunni eftir Mozart – svo vel að henni var boðið að syngja einnig í Brúðkaupi Fígarós.

Kristín hafði töluverð áhrif á stóra bróður sinn, Guðfinn. Hún heyrði á talrödd hans að hann gæti líklega sungið og plataði hann í inntökupróf fyrir kórinn í Langholtskirkju. Sjálfur segist Guðfinnur ekkert hafa sungið áður en hann stóð fyrir framan Jón Stefánsson og Ólöfu Kolbrúnu og söng sig inní kórinn. Á æfingum í kórnum sat Guðfinnur á milli efnilegra bassa-söngvara, þeirra Andra Björns og Oddi Arnþóri og heyrði því strax hvernig góður söngur ætti að hljóma. Meistaraverkin sem hann söng með kórnum vöktu áhuga Guðfinns á frekari söngnámi og hann hóf nám við Söngskólann í Reykjavík árið 2013. Eins og systir hans, hafði Guðfinnur töluverðan bakgrunn í tónlist. Hann spilaði á gítar og píanó í post-rock sveitinni For a Minor Reflection. Árið 2015 tók hann svo þátt í Söngvakeppni Sjónvarpsins með lagið Fjaðrir. Guðfinnur samdi lag og texta ásamt Hildi Kristínu Stefánsdóttur. Þau vöktu verðskuldaða athygli fyrir lagið og komust á úrslitakvöldið.
Í haust flytur Guðfinnur til Vínar til að stunda söngnám við MUK. Þau systkinin verða því bæði búsett í þeirri borg en Kristín stundar nú þegar nám við tónlistarháskólann í Vín. Það verður gaman að fylgjast með gengi þeirra beggja á komandi árum.

Mikill metnaður liggur á bak við tónleikana hjá þeim systkinum. Þau hafa gert það að hefð að fá ung tónskáld til að semja dúett í tilefni tónleikanna og að þessu sinni frumflytja þau verk eftir Hreiðar Inga Þorsteinsson. Til gamans má geta að Hreiðar er einnig fyrrum nemandi Söngskólans í Reykjavík.
Í fyrra var uppselt á tónleikana þeirra og því mælum við með að fólk tryggji sér miða á:
https://www.tix.is/is/event/3966/systkinatonleikar-a-sumardaginn-fyrsta/

Það verður notalegt að hlusta á þessi frábæru systkini syngja sumarið inn.